Тошкент вилоятининг Қибрай туманида бир оиланинг 16 нафар аъзоси ис газидан заҳарланиб, шифохонага ётқизилди, жабрланганларнинг 11 нафари болалар.
1 декабрь куни тахминан соат 05:30да Тошкент вилояти Қибрай тумани Алишеробод маҳалласидаги уйларнинг бирида истиқомат қилувчи бир оиланинг 16 нафар аъзоси ис газидан заҳарланиб, шифохонага мурожаат қилган.
Ўзбекистон Республикаси ИИВ ҳузуридаги Тергов департаменти хабарига кўра, ис газидан заҳарланганларнинг 11 нафари вояга етмаган болалар бўлган. Вафот этганлар йўқ.
Ҳодиса содир бўлган жойда тергов-тезкор гуруҳи ишламоқда. Мазкур ҳолат юзасидан қўшимча равишда маълумот берилади.
«Ҳурматли фуқаролар! Шу каби ҳолатларнинг олдини олиш мақсадида, сиздан, хонадонингиз ва бошқа бинолардаги газ анжомларида газ сизиб чиқиш ҳолатлари бор ёки йўқлигига эътиборли бўлишингизни ҳамда улардан фойдаланишда хавфсизлик техникаси қоидаларига риоя қилишингизни сўраймиз», дейилади департамент хабарида.
