2020 йилнинг 9 январь куни Европада хавфсизлик ва ҳамкорлик ташкилотининг (ЕХҲТ) амалдаги раиси Албания томонидан Ўзбекистоннинг ЕХҲТ ҳузуридаги доимий вакили, элчи Шерзод Асадовни ЕХҲТ доимий кенгаши Иқтисодий-экологик қўмитасининг жорий йилдаги раиси этиб тайинлаш тўғрисида қарор қабул қилинди.
Иқтисодий-экологик қўмита ЕХҲТ ҳудудидаги иқтисодиёт ва экология соҳаларидаги ҳамкорлик ва хавфсизлик билан боғлик кенг кўламли масалаларни, жумладан коррупцияга қарши курашиш проблематикаси, энергетика ва озиқ-овқат хавфсизлиги, транспорт ва логистика, миграция, ахборот-коммуникация ва «яшил» технологияларни ривожлантиришни назорат қилади.
Хавфсизлик масалалари бўйича қўмита раиси этиб Буюк Британиянинг ЕХҲТ ҳузуридаги доимий вакили, элчи Нил Буш, Инсон ҳуқуқлари бўйича қўмитанинг раиси этиб эса Чехиянинг ташкилот ҳузуридаги доимий вакили, элчи Иво Шрамек тайинланди.
