Украинада Порошенко ва Обама маъмуриятига қарши иш қўзғатилди

Фото : president.gov.ua

Украина коррупцияга қарши курашиш миллий бюроси АҚШ собиқ президенти Барак Обама, Украина собиқ президенти Пётр Порошенко ва АҚШ собиқ вице-президенти Жозеф Байденлар номи тилга олинган коррупция айблови бўйича суриштирув бошлади. Бу ҳақда олий рада депутати Ренат Кузьмин маълум қилди.

"Коррупцияга қарши курашиш миллий бюроси халқаро молиявий ёрдамни ўғирлагани ва ўғирланган маблағларни легаллаштиргани учун Порошенко ва Обамага қарши иш бошлади", - деб ёзди у ўзининг Telegram-каналида.

Депутатнинг аниқлик киритишича, "Дональд Трампнинг адвокати Рудольф Жулиани томонидан Украинадаги коррупция тўғрисида келтирилган фактлар ўрганилади".

14 январда Кузьмин "бюро детективлари 2014 йилда Украинада ким ва қандай мақсадларда ҳокимиятни қўлга олгани, Трампнинг шахсий адвокати Жулиани ёзган 100 млрд доллар қандай ва ким томонидан ўғирлангани ва офшорларга олиб чиқиб кетилганини аниқлашларига тўғри келиши"ни ёзганди.

Унинг айтишича, Жулиани Украинада ўғирланган пуллар Порошенко, [Хиллари] Клинтон ва Байден томонидан 30/70 нисбатда ўзлаштирилган.