АҚШда коронавирус сабабли фавқулодда ҳолат жорий қилинди. Яқинда Хитойда бўлган сайёҳларга мамлакатга кириш вақтинчалик тақиқланади.
Фавқулодда ҳолат киритилиши ҳақидаги фармонни АҚШ президенти Дональд Трамп имзолаган. Бу ҳақда АҚШ соғлиқни сақлаш ва ижтимоий хизматлар вазири Алекс Азар маълум қилди.
Вазирнинг таъкидлашича, фавқулодда ҳолат АҚШнинг шарқий соҳили бўйича 2 февраль соат 17.00дан амал қилишни бошлайди.
Ушбу тартиб коронавирус юқтириши хавфига эга хорижий фуқароларга АҚШга киришни вақтинчалик тақиқлайди.
Азарнинг айтишича, гап Хитойда 14 кун ёки ундан камроқ вақт аввал бўлган хорижликлар ҳақида бормоқда. АҚШ фуқаролари ва доимий резидентлари оила аъзолари бундан мустасно.
“АҚШнинг Хитойдан қайтаётган фуқаролари 14 кун давомида алоҳида кузатув остида бўлади”, деб қўшимча қилган вазир.
Бундан ташқари, фавқулодда ҳолат АҚШдан Хитойга парвозлар фақатгина 7 та аэропортдан амалга оширилишини кўзда тутади.
“Ҳозирда америкаликлар учун вирус юқтириш хавфи паст, бу чоралар эвазига у паст бўлиб қолишини таъминлаймиз”, деб таъкидлаб ўтган Азар.
Аввалроқ Жаҳон соғлиқни сақлаш ташкилоти Хитойдаги коронавирус эпидемиясини халқаро даражадаги фавқулодда ҳолат деб тан олганди.
