Мюнхенда хавфсизлик бўйича халқаро анжуман ўз ишини бошлади

Хавфсизлик бўйича Мюнхен анжумани 14 февралда 56-марта ўз ишини бошлади. Анжуман иштирокчиларини унинг кўп йиллик раиси Вольфганг Ишингер қутлади. Жорий йилда анжуманда 150 га яқин давлат раҳбарлари ва бош вазирлари иштирок этади.

Фото: РИА Новости / Алексей Витвицкий

“Дунё ҳозирда ҳақиқатан жуда хавфли тус олган. Очиқчасига айтиш керак, халқаро хавфсизликка таҳдидлар ва ихтилофларни ҳал қилиш учун жамоавий ҳаракатлар етарли бўлмаяпти. Қурол пойгаси авж олаётган бир вақтда одамлар ҳалок бўлишда давом этмоқда”, деб таъкидлаб ўтган Ишингер ўз нутқида. У ҳозирги даврни “жазоланмаслик даври” деб атаган ҳамда давлатлар “бир-бири ҳақида эмас, балки бир-бири билан гаплашиши кераклигини” айтган.

Ишингер БМТ каби халқаро институтларни мустаҳкамлашга чақирган.

Анжуманда 800 дан кўпроқ делегат, жумладан 150 тага яқин давлатнинг раҳбарлари, бош вазирлари ва ҳукумат аъзолари иштирок этади.

Мюнхен анжумани 1963 йилда НАТОга аъзо давлатлар мудофаа вазирликлари вакилларининг йиғилиши сифатида ташкил этилган. Ҳозирда халқаро анжуман ўнлаб давлатларнинг сиёсатчилари, дипломатлари, ҳарбийлари, тадбиркорлари, илм-фан ва жамоат арбоблари учун халқаро мунозара майдонига айланган.

Анжуман анъанавий равишда Мюнхеннинг тарихий марказида жойлашган Bayerischer Hof меҳмонхонасида бўлиб ўтади.

2019 йилда анжуманда 600 дан кўпроқ делегат иштирок этган. Унда асосий эътибор Яқин Шарқ, Арктика, Болқон, Қора денгиздаги вазиятларга, энергия хаавфсизлиги ва киберхавфсизлик, қуролланишни назорат қилиш масалаларига қаратилган.