Афғонистонда АҚШ қуролли кучлари толибларга авиазарбалар берди

Таъкидланишича, авиазарбалар Афғонистон қуролли кучлари пунктларига ҳужум қилган толиблардан ҳимояланиш мақсадида берилган.

Фото: U.S. Marine Corps/Sgt. Gabriela Garcia/Public Domain via DVIDS

Афғонистоннинг Ғилминд вилоятида АҚШ қуролли кучлари “Толибон” ҳаракати жангариларига авиазарбалар берди. Бу ҳақда Америка қуролли кучлари вакилига таяниб Reuters хабар берди.

Унинг сўзларига кўра, авиазарбалар Афғонистон қуролли кучлари пунктларига ҳужум қилган толиблардан ҳимояланиш мақсадида берилган.

29 февраль куни Қатар пойтахти Доҳада АҚШ ва “Толибон” ҳаракати ўртасида тинчлик келишуви имзоланди. Келишувни АҚШнинг Афғонистон бўйича махсус вакили Залмай Халилзод ҳамда “Толибон” етакчисининг ўринбосари, ҳаракатнинг Қатардаги офиси раҳбари мулла Абдулла Ғани Бародар имзолади.

Аввалроқ АҚШ БМТ Хавфсизлик кенгашига “Толибон” ҳаракатидан террорчи мақоми ва санкцияларни олиб ташлашни сўраб мурожаат қилгани хабар қилинганди.

Тайёрлаган: Дилшод Аскаров

#Афғонистон #толибон