Руминия бош вазири карантинга кетди

Фото: Reuters

Руминия бош вазири лавозимини бажараётган Людовик Орбан коронавирус аниқланган сенатор билан мулоқотда бўлгандан кейин карантинга кетишга қарор қилди.

“Мен карантинга кетмоқдаман ва ўз мажбуриятларимни масофадан бажараман”, деб айтган Орбан журналистларга.

Таъкидланишича, Орбан 9 март куни коронавирусга учраган сенатор иштирок этган учрашувга ташриф буюрган.

Коронавирусга нафақат Орбан, балки бир қатор вазирлар ҳам текширилмоқда. Агар текширув натижаларига кўра яна касалланиш ҳолатлари аниқланса, унда бутун ҳукумат карантинга жўнатилиши мумкин.

Бундай вазият Руминияда сиёсий инқироз авж олган бир вақтда юз берди. Ўтган ой Орбан ҳукумати парламент ишончсизлик билдиргандан кейин истеъфога жўнатилганди.

Айни вақтда Руминияда коронавирусга чалинганлар 70 кишини ташкил қилмоқда. Мамлакатда таълим ва маданият муассасалари ёпилган. Бир қатор давлатлар, жумладан Хитой ва Италиядан учиб келганлар икки ҳафталик карантиндан ўтишлари керак.

Тайёрлаган: Шуҳрат Раҳимов

#бош вазир #Руминия #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.