Малайзия ҳам чегараларини ёпишни бошлайди

Мамлакатдаги барча мактаб ва университетлар, кўплаб корхоналар ҳам ёпилиши кўзда тутилган. Ҳукумат душанба куни Жануби-Шарқий Осиёдаги коронавирус билан боғлиқ ҳолат юқори даражага кўтарилгандан сўнг шундай қарорга келган.

REUTERS/Lim Huey Teng

Малайзия ҳам саёҳатчилар учун ўз чегараларини ёпишни бошлайди. Бу ҳақда Reuters хабар бермоқда.

Мамлакат бош вазири Муҳиддин Яссин ўз интервьюсида чоршанба кунидан бошлаб 31 мартгача барча қарорлар кучга киришини маълум қилди.

«Ҳукуматимиз одамларимиз ҳаётига хавф соладиган пандемия тарқалишини тўхтатиш учун барча чораларни кўради. Мактаблар ва университетлар ёпилади. Шунингдек, хизмат кўрсатиш компанияларидан ташқари давлат ва хусусий бизнес марказлари ҳам ўз фаолиятини тўхтатади. Чет элликларнинг киришига ҳамда фуқароларнинг чиқиб мамлакат ҳудудидан чиқиб кетишларига йўл қўйилмайди», дейди у.

Малайзия вирус юқтирганлар сони бўйича минтақадаги етакчи давлат бўлиб турибди, 17 март ҳолатига кўра, мамлакатда 566 кишида вирус аниқланган.

28 февраль-1 март кунлари Куала-Лумпурдаги диний йиғинлар вақтида 338та ҳолат қайд этилган. Малайзия соғлиқни сақлаш вазири ҳозирча ушбу тадбирда қатнашган 14,500 малайзияликдан 7000 нафари текширувлардан ўтказилганини маълум қилган.

#Малайзия #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.