Масжидул-ҳаром ва Набавий Масжидида ҳам жамоат намозлари ўқилиши тўхтатилди

Саудия Арабистони ҳукумати коронавирус эпидемияси олдини олиш мақсадида бутун дунё мусулмонлари учун икки бош муқаддас қадамжо - Маккадаги Масжидул-ҳаром ва Мадинадаги Набавий Масжидда ибодатларни вақтинча тўхтатишга кўрсатма берди.

Фото: Anadolu Agency

Бу ҳақда “Ал-Ихбория” телеканали хабар берди.

Ушбу чора 20 мартдан кучга киради ва вазият ўнгланмагунча амал қилади.

17 мартдан подшоҳликда Масжидул-ҳаром ва Набавий Масжиддан ташқари барча масжидларда жамоат, жумладан жума намозларига вақтинча тақиқлов киритилганди. Энди бу икки бош масжид ҳам ибодатлар учун ёпилади.

“Макка ва Мадинадаги икки муқаддас масжид, жумладан уларнинг ҳовлиларида жамоат намозларини адо этиш вақтинча тўхтатилади”, дейилган хабарда.

Февраль охирида Саудия Арабистони расмийлари Макка шаҳрида Умра амалини бажариш ва Мадинада Набавий Масжидни зиёрат қилиш учун келадиган фуқароларнинг мамлакатга киришини вақтинча тўхтатиб қўйганди.

Охирги маълумотларга кўра, подшоҳликда коронавирусга чалинганлар сони 19 март куни 36 нафарга кўпайиб, умумий ҳисобда 274 нафарга етган.

Тайёрлаган Шуҳрат Раҳимов

#Саудия Арабистони #жамоат намозлари #Масжидул-ҳаром

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.