Фуқароларга дала ҳовлиларга боришдан тийилиб туриш тавсия этилди

ИИВ Хавфсиз туризмни таъминлашни мувофиқлаштириш бошқармаси фуқароларга огоҳлантириш билан чиқди.

ИИВ республика ҳудудида коронавирус тарқалишининг олдини олиш, санитария-эпидемиологик вазиятнинг барқарорлигини ҳамда фуқароларнинг хавфсизлигини таъминлаш мақсадида, Тошкент вилояти ва республиканинг бошқа ҳудудларида хусусий тартибда ижарага берилаётган дала ҳовлиларга бормасликни сўраган.

“Дала ҳовлиларнинг қисқа муддатларга ижарага берилиши, уларга турли ҳудудлардан фуқароларнинг ташриф буюриши, аксарият дала ҳовлиларда дезинфекция тадбирлари талаб даражасида олиб борилмаслиги ва санитария-эпидемиология қоидаларига риоя қилинмаслиги каби ҳолатлар ушбу жойларда вирусли инфекциялар юқиши ва тарқалишининг юқори хавфини келтириб чиқаради.

Карантин вақтида энг хавфсиз жой ўзингиз яшаб турган уйингиз эканлигини унутманг. Ўзингиз, яқинларингиз ва бошқа фуқароларимизнинг соғлиғини асраш ўз қўлингизда!” - ИИВ ахборот хизмати маълумотида.

Бундан олдин, бемор телефонни иккинчи одамга берганда, вирус ҳам ўтиши мумкин экани хабар берилганди.