Бишкекда комендантлик соати жорий этилмоқда

Қирғизистон президентининг фармонига кўра, Бишкек, Ўш ва Жалолобод шаҳарлари ҳамда Ўш ва Жалолобод областларининг учта районида 25 март эрталаб соат 8дан фавқулодда ҳолат жорий этилади ва 15 апрелгача давом этади.

Фото: 24.kg

Қирғизистон пойтахти коменданти, республика ички ишлар вазирининг ўринбосари Алмазбек Орозалиев Бишкекда комендантлик соати жорий этилишини маълум қилди.

"25 март соат 20дан комендантлик соати амал қилиши бошланади", - деди у.

Орозалиевнинг сўзларига кўра, пойтахтда эрталаб соат 7гача аҳоли ва транспорт ҳаракати тақиқланади.

У шунингдек, шаҳарда бўлиб турган мамлакатнинг бошқа ҳудудларидан бўлган аҳолисини Бишкекни яқин соатлар ичида тарк этишга чақирди. Маълум қилинишича, акс ҳолда уларга нисбатан чора кўрилади.

Комендантлик соати вақтида шифокорлар, ички ишлар органлари ходимлари ва ҳарбий хизматчиларга махсус рухсатномалар тақдим этилади.

Маълумотларга кўра, ҳозиргача мамлакатда коронавирусга чалиниш билан боғлиқ 42та ҳолат қайд этилган.

#Қирғизистон #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.