Россияда савдо нуқталарининг қарийб 40 фоизи вақтинчалик ёпилди

Россияда савдо нуқталарининг 37 фоизи иш фаолиятини вақтинчалик тўхтатди, деб хабар берди «Эвотор» IT-компанияси. Компания савдо нуқталарининг 30 март ҳолатига фаоллигини таҳлил қилди ва уларнинг февралдаги фаоллиги билан таққослади.

Маълум қилинишича, ноозиқ-овқат дўконлари орасида энг кўп жабр кўрганлари кийим дўконлари бўлди: бу дўконларнинг 85 фоизи ишлашни тўхтатган. 

Гул дўконларининг 78, электроника дўконларининг 75 фоизи ёпилган.

71 фоиз фитнес-марказлар ва 65 фоиз меҳмонхоналар фаолиятини тўхтатган.

Ошхоналарнинг 65 фоизга яқини ва қаҳвахона ҳамда ресторанларнинг 42 фоизи ишламаяпти. Айримлари уйга таом етказиб бериш орқали фаолиятини давом эттирмоқда.

Супер ва минимаркет, новвойхона ва зоодўконларнинг 25 фоизга яқини вақтинчалик ёпилган. Улар ишлашда давом этиши мумкин эди, аммо харидорлар оқимининг камайгани, ходимларнинг касаллиги ёки маҳсулот етказиб беришдаги қийинчиликлар сабабли ишлашни тўхтатган, деб тахмин қилмоқда «Эвотор».