Трампнинг ЖССТ бўйича қарори жаҳон бўйлаб танқид остига олинмоқда

«Дунё аҳли коронавирус пандемиясига қарши курашда қандай қилиб олдинга силжишни ўйлаётган бир вақтда президент Трамп қўшимча зарба берди», деб ёзмоқда The New York Times. 

Мазкур нашр дунё етакчилари ҳам Трампнинг бу қарорини қоралаганига эътибор қаратган.

Жумладан, БМТ бош котиби Антонио Гутеррешнинг огоҳлантиришича, ЖССТ бугун инқирознинг олдинги қаторида турибди. Айни шундай вазиятда молиявий ёрдамни тўхтатишнинг вақти эмас эди. «Фикримча, пандемияни енгиш учун ЖССТнинг қўллаб-қувватланиши ҳозир жуда муҳимдир», деган у.

АҚШ ЖССТга йилига 400 млн доллардан зиёд ҳисса қўшадиган энг йирик донор ҳисобланарди.

Германия ташқи ишлар вазири Ҳайко Маас ҳам Дональд Трампга нисбатан танқидий фикрларини очиқ хат орқали маълум қилган.

Хитой ташқи ишлар вазири ҳам АҚШни ЖССТ олдидаги мажбуриятни бажаришга чақирган.

Африка Иттифоқи раиси Мусо Муҳаммад эса ҳолатга ўз муносабатини иккита сўз билан ифода этган: «Чуқур таассуф!»

«Вирус тарқалишига қарши секин ва самарасиз чора кўргани учун танқидга учраган жаноб Трамп ЖССТни айблашга ўтди», деб ёзмоқда ОАВ.