Нодир кинофильмлар онлайн намойиш этилади

Жорий йилнинг апрел, май, июн ойларида Тошкент замонавий санъат маркази Марказий Осиё кинорежиссёрларининг нодир киноасарларини онлайн томоша учун тақдим этади. Бу ҳақида Маданият вазирлиги ҳузуридаги Маданият ва санъатни ривожлантириш жамғармаси хабар бермоқда.

Марказнинг Tashkent Film Encounters янги лойиҳаси турли йўналишларда фаолият олиб борувчи халқаро муаллифларнинг ўзаро ҳамкорлигини назарда тутади. Санъатнинг турли йўналишидаги халқаро экспертлар Ўзбекистон пойтахтида учрашиб, маҳаллий санъат вакиллари билан фикр алмашадилар. Tashkent Film Encounters’нинг ҳар бир қисми муайян мавзуга бағишланиб, дастур доирасида мунозаралар, маърузалар, кўргазмалар, спектакллар ва маҳорат дарслари ташкил этилади.

Лойиҳанинг илк дастури Марказий Осиё замонавий киносига бағишланган. Қозоғистон, Қирғизистон, Тожикистон ва Ўзбекистон режиссёрлари ўз муаллифликларидаги замонавий кино классикасига айланган фильмларни намойиш этишади. Лойиҳа томошабинларга 90-йилларнинг бошларидан ҳозирги кунгача кино эволюциясини кузатишга имкон беради.

Бугун, 17 апрелдан бошлаб старт оладиган кинотақдимот доирасида очиқ фойдаланишда бўлмаган оригинал фильмларни юқори сифатда томоша қилиш мумкин. Кинотақдимотни Юсуф Розиқовнинг “Воиз” (Оратор) фильми бошлаб беради.

Кинотақдимотлар дастури:

17-24 апрел – “Воиз”

24 апрел-1 май – “Кош ба кош”

1-8 май – “Уч оға-ини”

8-15 май – “Селкинчек”

15-22 май – “Кардиограмма”

22-29 май – “Асалари учганда”

29 май – 5 июн – “Осмондаги болалар”

5-12 июн – “Жанубий денгизлар қўшиқлари”

12-19 июн – “Феллини”.

Фильмларни Тошкент замонавий санъат марказининг расмий саҳифасида (ccat.uz) онлайн томоша қилиш мумкин.