Британияда коронавирусга қарши вакцина ишлаб чиқариш бошланади

Келаётган ҳафтадан Британияда коронавирусдан вакцина клиник синовлардан ўтказилмаганига қарамай ишлаб чиқарила бошланади.

Фото: EPA

Бу ҳақда 18 апрелда Оксфорддаги Женнер институти директори Адриан Хилл маълум қилди.

Унинг таъкидлашича, сентябргача ChAdOx1 nCoV-19 деб номланган ушбу вакцинадан 1 млн дона ишлаб чиқариш режалаштирилган. Параллел равишда унинг синовлари олиб борилади, деб хабар берди Sky News телеканали.

Хиллнинг айтишича, вакцина самарали бўлиши эҳтимоли 80 фоизни ташкил қилади.

Ушбу восита шимпанзенинг зарарсиз вируси негизида корнавирус геноми қўшилган ҳолда ишлаб чиқилган.

Олимнинг таъкидлашича, бундай технология аввал бошқа касалликларга қарши курашда самарали эканини тасдиқлаган.

ЖССТ маълумотларига кўра, ҳозирда дунёда коронавирусга қарши умумий ҳисобда 70 та вакцина устида ишлаб олиб борилмоқда. Мутахассисларнинг фикрича, бундай вакциналар барча синовлар ҳисобга олинганда, 1-1,5 йил ичида ишлаб чиқарила бошланиши мумкин.

Тайёрлаган Шуҳрат Раҳимов

#вакцина #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.