24 апрелдан Тойлоқ туманига кириш ва чиқиш чекланади

24 апрель 06:00да бошлаб Самарқанд вилояти Тойлоқ туманига кириш ва чиқиш чекланади. Бу ҳақда Zarnews.uz сайтининг телеграмдаги саҳифасида эълон қилинган.

«Коронавирус пандемиясига қарши курашишга қаратилган карантин тадбирларини самарали ташкил этиш мақсадида 2020 йил 24 апрель куни соат 06:00дан бошлаб Тойлоқ туманига кириш ва чиқиш чекланади», дейилади постда.

Kun.uz мухбирининг хабар беришича, тумандаги қишлоқларнинг орасида ҳам бетон тўсиқлар ўрнатилган ва фуқароларнинг қишлоқлараро ҳаракати чекланган. Қишлоқларда фақат битта туман марказига чиқадиган йўл очиқ қолдирилган. Махсус рухсатномаси борлар, озиқ-овқат дўконларига маҳсулот етказаётган уловлар, шунингдек, тез ёрдам машиналар фақат битта йўл орқали текширувдан ўтказиб, қишлоқларга кирмоқда.

Тошкент-Термиз трассаси бўйидаги Тойлоқ туманининг Самарқанд тумани билан чегарасида эса март ойининг охирида пост ташкил қилинган ва машиналар рухсатнома билан ўтказилаётганди.

Маълумот учун, Жомбой, Самарқанд ва Ургут туманлари билан чегарадош бўлган Тойлоқ туманида 200 мингдан кўпроқ одам истиқомат қилади.