24 apreldan Toyloq tumaniga kirish va chiqish cheklanadi

24 aprel 06:00da boshlab Samarqand viloyati Toyloq tumaniga kirish va chiqish cheklanadi. Bu haqda Zarnews.uz saytining telegramdagi sahifasida e'lon qilingan.

«Koronavirus pandemiyasiga qarshi kurashishga qaratilgan karantin tadbirlarini samarali tashkil etish maqsadida 2020 yil 24 aprel kuni soat 06:00dan boshlab Toyloq tumaniga kirish va chiqish cheklanadi», deyiladi postda.

Kun.uz muxbirining xabar berishicha, tumandagi qishloqlarning orasida ham beton to‘siqlar o‘rnatilgan va fuqarolarning qishloqlararo harakati cheklangan. Qishloqlarda faqat bitta tuman markaziga chiqadigan yo‘l ochiq qoldirilgan. Maxsus ruxsatnomasi borlar, oziq-ovqat do‘konlariga mahsulot yetkazayotgan ulovlar, shuningdek, tez yordam mashinalar faqat bitta yo‘l orqali tekshiruvdan o‘tkazib, qishloqlarga kirmoqda.

Toshkent-Termiz trassasi bo‘yidagi Toyloq tumanining Samarqand tumani bilan chegarasida esa mart oyining oxirida post tashkil qilingan va mashinalar ruxsatnoma bilan o‘tkazilayotgandi.

Ma'lumot uchun, Jomboy, Samarqand va Urgut tumanlari bilan chegaradosh bo‘lgan Toyloq tumanida 200 mingdan ko‘proq odam istiqomat qiladi.