ЖССТ компьютер тизимларига киберҳужумлар сони 5 маротаба ошди

Ўтган бир ҳафта ичида кибержиноятчилар ЖССТнинг 450 та электрон манзили ва паролини ўғирлаган. Ташкилот маълумотлар базаларига зарар етмаган.

Шунингдек, ЖССТ номидан коронавирус билан курашиш жамғармасига пуллар ўтказиш чақириғи билан электрон мактублар жўнатилиши ҳолатлари кўпайган. “Фирибгарлар одамларни алдашга уринишларини кўпайтирган. Натижада хайриялар коронавирусга қарши курашиш жамғармамиз Solidarity Response’га эмас, балки жиноятчилар кўрсатган манзилларга тушган”, дейилган ЖССТ баёнотида.

ЖССТ вакилларининг таъкидлашича, улар ўз ахборот тизимлари хавфсизлигини кучайтириш устида иш олиб боришмоқда.