Камбоджада 12 кундан буён коронавирусга чалиниш ҳолатлари қайд этилмади

Камбоджа бош вазири Хун Сен мамлакатда 12 кундан буён коронавирусга чалиниш ҳолатлари қайд этилмагани хотиржамликка асос бўлмаслигини, аҳоли эпидемияга қарши кураш бўйича тавсияларга риоя қилиши кераклигини билдирди.

"Коронавируснинг хавфлилигини жиддий баҳолашга чақираман. Бу борада мамлакатда ҳар доим ҳаммаси яхши бўлади деб ўйламанг", - деб ёзди у Facebook саҳифасида.

У мамлакат пойтахти Пномпен кўчаларида яна автомобиллар тирбандлиги пайдо бўлганини қайд этди.

Хун Сен ниқоб тақиш ва дезинфекция воситаларидан фойдаланиш касаллик юқтиришдан энг зарур ҳимоя эканлигини эслатиб ўтди. 

"Зарурат бўлмаса кўчага чиқманг. Зарур ҳолларда уйдан фақат бир киши чиқсин. Ўзингизни ва бошқаларни хавф остига қўйманг!", - деб ёзди у.

Камбоджада эпидемия бошланганидан бери 122 киши коронавирусга чалинган бўлиб, касаллик юқтириш билан боғлиқ охирги ҳолат 12 апрелда қайд этилган. Касалликка чалинганларнинг 110 нафари тўлиқ соғайган, ўлим ҳолатлари юз бермаган.