28 апрелда Бразилия олий суди мамлакат президенти Жаир Болсонаруга нисбатан тергов ўтказилишига рухсат берди. Болсонару ҳуқуқ-тартибот идоралари фаолиятига аралашишда ва судга тўсқинлик қилишда айбланмоқда.
Бу ҳақда Reuters ахборот агентлиги хабар берди.
Президентга қарши айбловларни 24 апрелда истеъфога чиққан собиқ адлия вазири Сержиу Мору илгари сурди. У бу айбловларга президент билан ўзаро зиддиятлар ҳамда федерал полиция раҳбари Маурисиу Лейче Валейшунинг ўз лавозимидан бўшатилиши сабаб бўлганини айтган. Морунинг фикрича, Валейшунинг бўшатилиши полиция президент ўғилларига қарши олиб бораётган аксилкоррупциявий тергов билан боғланган. Мору, шунингдек, Болсонаруни ҳужжатларни сохталаштиришда айблаб, президентнинг полиция бошлиғининг ўз лавозимидан олиниши ҳақидаги фармонидаги электрон имзоси қалбаки эканини айтган.
“Президент ўз қилмишлари учун жиноий жавобгарликдан озод этила олмайди, чунки ҳеч бир инсон, жумладан мамлакат раҳбари, конституция ва республика қонунларидан устун бўла олмайди”, дейилган олий суд баёнотида. Судья Морунинг айбловлари бўйича 60 кун ичида тергов ўтказишни буюрган. Тергов натижаларига кўра прокуратура президентга расман айблов қўйиш-қўймаслик ҳақида қарор қабул қилади. Президентга айбловларнинг қўйилиши иш олий судга оширилиши учун конгресснинг қуйи палатаси томонидан ҳам маъқулланиши лозим. Бу ҳолатда Болсонару 180 кунга ўз лавозимини бажаришдан вақтинчалик четлатилади. Агар унинг айби исботланса, у импичмент тартиботи орқали ўз лавозимидан маҳрум этилиши мумкин.
Аммо таъкидланишича, депутатлар палатаси президент тарафдорлари томонидан назорат қилиниши сабабли бунинг эҳтимоли кам. Шу билан бирга, собиқ адлия вазирининг айбловлари тасдиқланмаса, унинг ўзи президент номига ёлғон айбловлар учун жавобгарликка тортилиши мумкин. Болсонарунинг ўзи эса ўз номига билдирилаётган айбловларни асоссиз деб ҳисобламоқда ва ўз оила аъзоларини ҳимоя қилиш учун ҳеч қачон полицияга босим ўтказишга уринмаганини айтмоқда.
Мору Бразилия вазирлар маҳкамасини икки ҳафта ичида тарк этган иккинчи вазир бўлди. Аввалроқ ўз истеъфоси ҳақида соғлиқни сақлаш вазири Луиc Энрике Мандетта эълон қилган. Унинг истеъфога кетиши у ва президент ўртасида коронавирус тарқалиши билан боғлиқ чоралар бўйича зиддият юзага келгани билан боғланган.
