Нигерия Африкада биринчи бўлиб карантин чораларини юмшатади

Нигерия президенти Муҳаммаду Бухорий карантин чоралари юмшатилишига сабаб пандемияни тўхтатиш бўйича кўрилган чораларнинг самарали бўлганлиги билан изоҳлади.

Фото: REUTERS

Коронавирус пандемияси сабабли Нигериянинг йирик шаҳарларида 30 мартдан жорий этилган карантин чоралари 4 майдан юмшатилади. Бу ҳақда The Nation газетаси хабар берди.

Мамлакатда карантин ўрнига соат 20:00дан 06:00гача комендантлик соати жорий этилади. Тиббий ниқоб тақиш, йиғилишлар ўтказмаслик талаблари сақланиб қолади, аҳолини коронавирусга тестдан ўтказиш кенгайтирилади.

"Пойтахт округи, Лагос ва Огун штатларида чеклов чораларини босқичма-босқич енгиллатиш маъқулланди", - деди Нигерия президенти Муҳаммаду Бухорий халққа телемурожаатида.

Бу ҳудудларда аҳоли ҳаракатланиши чекланган ва уйдан фақатгина озиқ-овқат дўкони ёки дорихонага чиқишга рухсат этилганди. Душанбадан бу чекловлар бекор қилинади.

Нигерия раҳбари карантин чоралари юмшатилишига сабаб пандемияни тўхтатиш бўйича кўрилган чораларнинг самарали бўлганлиги билан изоҳлади.

Маълумотларга кўра, Нигерияда коронавирусга чалинганлар сони 1337 киши бўлиб, 40 киши вафот этган.

Тайёрлаган Дилшод Аскаров

#Нигерия #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.