Туркияда коронавирус тарқалишининг энг юқори даражасидан ўтилди

Туркия коронавирус эпидемиясининг энг юқори даражасидан ўтди. Мамлакатда айни вақтда коронавирусдан вафот этиш бўйича Европада энг паст кўрсаткич қайд қилиниб, вирусга чалинганларнинг 6 фоизини шифокорлар ташкил этмоқда.

Фото: REUTERS/Murad Sezer

Бу ҳақда соғлиқни сақлаш вазирлигига таяниб Milliyet нашри хабар берди.

“Туркияда коронавирусдан ўлим даражаси Европада энг паст ҳисобланади. Мамлакатда пандемиянинг энг юқори даражасидан ўтилди. Чекловларга амал қилинса, май охиригача беморлар ўсиши кутилмаяпти”, деб айтган Туркия соғлиқни сақлаш вазири Фаҳриддин Хўжа.

Вазирнинг таъкидлашича, мамлакат бўйича вирусга чалинганларнинг 60 фоизи Истанбулда яшайди ва 20 млн кишилик мегаполисда коронавирус тарқалиши тўхтатилгани ҳукуматнинг катта муваффақияти ҳисобланади.

Туркияда коронавирусга чалиниш бўйича биринчи ҳолат 10 мартда маълум қилинганди, 24 апрелда эса вирусга чалинганлар сони 100 мингдан ошганди.

Шунингдек, Туркия президенти Ражаб Тоййиб Эрдўған май байрамларига мамлакатда комендантлик соати эълон қилди.

Охирги маълумотларга кўра, Туркияда коронавирусга чалинганлар сони 117 мингдан кўпроқни, ундан вафот этганлар сони 3081 нафарни ташкил қилмоқда.

Тайёрлаган Шуҳрат Раҳимов

#Туркия #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.