Virgin Atlantic авиакомпанияси ходимларининг 30 фоизини ишдан бўшатади

Авиакомпания инқирозгача бўлган ҳолатга қайтиш уч йилгача вақтни олиши мумкинлигини тахмин қилмоқда.

Фото: Getty Images

Миллиардер Ричард Бренсон асос солган Британиянинг Virgin Atlantic авиакомпанияси инқироз сабабли 3150 нафар ишчисини ёки ходимларининг 30 фоизини ишдан бўшатиши ҳақида эълон қилди. Бу ҳақда MarketWatch хабар бермоқда.

"Парвозлар қачондан бошланиши борасидаги ишончсизлик ҳамда пандемия сабабли юзага келган бозордаги шароит жаҳон авиасоҳаси ҳамда Virgin Atlantic компанияси даромадининг сезиларли пасайишига олиб келди", - дейилади авиакомпания баёнотида.

Компания инқирозгача бўлган ҳолатга қайтиш уч йилгача вақтни олиши мумкинлигини тахмин қилмоқда.

Апрель ўрталарида International Consolidated Airlines Group S.A. (IAG) авиагуруҳи биринчи чоракдаги ёмон натижадан сўнг British Airways 12 минггача ходимини ишдан бўшатиши мумкинлиги тўғрисида огоҳлантирганди.

Аввалроқ Еврокомиссия Франция ҳукуматига Air France авиакомпаниясига 7 млрд евро миқдорида молиявий ёрдам кўрсатишга рухсат берганди.

Тайёрлаган Дилшод Аскаров

#авиакомпания

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.