АҚШ Очиқ осмон ҳақидаги келишувдан чиқади

Бу ҳақда АҚШ ОАВ хабар берди. Уларнинг маълум қилишича, Трамп Оқ уйда журналистлар билан суҳбатда Россия билан яхши муносабатда эканини, бироқ Москва ушбу келишув бўйича ўз мажбуриятларини бажармаётганлигини айтган. 

Шу мазмунда Трамп янги келишув тузилиши мумкинлигини айтган. Унинг фикрича, Россия “ўзи келиб, битим тузиш истагини билдиради”.

АҚШ президентининг қўшимча қилишича, Вашингтон келгусида келишувга муайян шартлар билан қайтиши ёки тубдан янги келишувни тайёрлаш вариантини кўриб чиқиши мумкин.     

“Янги келишув тузишга ёки дастлабки келишувга қайтишга имкон берувчи нимадир қилишга яхши имкониятлар бор”, деб таъкидлаб ўтган Трамп. 

АҚШ президенти “Россия ўз мажбуриятларини бажармагунча, АҚШ келишувдан ташқарида бўлишини” айтган.

Аввалроқ The New York Times нашри ўз манбаларига таяниб, Вашингтон 22 май куни Москвани Очиқ осмон ҳақидаги келишувдан чиқиши ҳақида хабардор қилмоқчи эканини маълум қилган. Ўз навбатида Associated Press ахборот агентлигининг хабар қилишича, Трамп маъмурияти бу ҳақида хорижий ҳамкорларни хабардор қилган. 

Очиқ осмон ҳақидаги келишув 1992 йил 24 март куни Хельсинкида Европада хавфсизлик ва ҳамкорлик ташкилотига аъзо 23 давлат вакиллари томонидан имзоланган. Ҳозирда 34 та давлат унинг иштирокчилари саналади. Бу давлатлар ҳарбий фаолиятни назорат қилиш мақсадида бир-бирлари ҳудудлари устидан уча олади.  

Келишув муддатсиз ҳисобланади. Унга аъзо исталган давлат ундан чиқиш ҳуқуқига эга, бироқ бу ҳақида 6 ой аввал огоҳлантириши керак. Шундан кейин келишув депозитарийлари бўлган Канада ва Венгрия қолган давлатларни бундан хабардор қилади. Шунингдек, депозитарийлар бу қандай оқибатларга олиб келиши мумкинлигини кўриб чиқиш мақсадида огоҳлантириш олгандан 30 кун кейин ва 60 кундан кеч бўлмаган муддатда келишувга аъзо давлатлар анжуманини чақиртиради.