Жанубий Кореяда прокуратура Samsung раҳбарини ҳибсга олишга ордер сўради

Жанубий Корея прокуратураси судга мурожаат қилиб, Samsung Electronics вице-президенти ва Samsung Group раҳбари Ли Чжэ Ённи ҳибсга олишга ордер сўради. Бу ҳақда «Рёнхап» агентлиги хабар бермоқда.

Агентликнинг қайд этишича, судга Сеул бош округ прокурорининг 2015 йилдаги Cheil Industries ва Samsung C&T корпорацияларининг бирлашиши тўғрисидаги иш бўйича иқтисодий жиноятлар ва адлия офиси мурожаат қилган. Келишув натижасида Ли Чжэ Ён конгломерат устидан ягона шахсий назоратни қўлга киритганди.

Хабарда айтилишича, прокурорлар Samsung бош менежерларини корпорацияни бошқариш ҳуқуқини Ли Чжэ Ённинг отаси ва 2014 йилдан буён тўшакка ётиб қолган компания расмий раҳбари Ли Гон Хидан олиб Ёнга беришга алоқадорликда гумонланмоқда. Айбловчилар Cheil Industries акцияларининг катта пакетига эга бўлган Ли Чжэ Ён Samsung C&T компанияси акциялари нархини пасайтириб сотиб олган деб ҳисобламоқда.

Ли Чжэ Ён 2016 йилда Жанубий Корея собиқ президенти Пак Кин Хе иштирокидаги коррупцион можарода асосий шахслардан бири бўлганди. Тергов маълумотларига кўра, мамлакат собиқ раҳбарининг дугонаси Чхве Сун Силь йирик корпорациялар, жумладан, Samsung ва Lotte компанияларидан пул ундириб келган. 2016 йилда Пак Кин Хега импичмент эълон қилинган. Чхве Сун Силь 2018 йил февралда 20 йилга қамалган. Собиқ президент эса давлат сирини ошкор қилиш, таъмагирлик, мансабини суистеъмол қилиш ва пора олиш айбловлари билан 25 йилга қамалган ва 17,8 млн доллар жаримага тортилган.  

Ли Чжэ Ён 2017 йилда Пак Кин Хега алоқадор компанияларга пора беришда айбланиб беш йилга қамалган, аммо бир йилдан сўнг озодликка чиққан.