Кампирўлдидан Тентаковулгача: Пайариқда 8та қишлоқ номи ўзгарди

Охирги йилларда республикада кўплаб аталиши «хунук» деб топилган ҳудудларнинг номи ўзгартирилмоқда. «Географик объектларнинг номлари тўғрисида»ги қонунда белгиланган талаблардан келиб чиқиб Самарқанд вилояти Пайариқ туманида ташкил этилган махсус комиссия томонидан 8та қишлоқнинг номи ўзгартирилди.

Номи ўзгарган қишлоқлар орасида Кампирўлди, Тентаковул, Қўтирбулоқ, Қарри каби ҳудудлар бор. Пайариқ туман ҳокимлигининг ахборот хизмати қайси қишлоқларнинг номи ўзгарганини эълон қилди.

Эндиликда Пайариқда қуйидаги қишлоқлар бошқача ном билан аталади:

Бешкал қишлоғи номи БЕШБУЛОҚ деб, Кампирўлди қишлоғи МАШЪАЛ деб, Қарри қишлоғи НАВРЎЗ деб, Қўтирбулоқ қишлоғи САХОВАТ деб, Тентаковул қишлоғи МИТАНОБОД деб, Вали қишлоғи ВАЛИЙ деб, Батрак қишлоғи КАТТАБОҒ деб, Қўтиркент қишлоғи номи ЯНГИ ҲАЁТ деб ўзгартирилди.