Жорий йилнинг 20 июнидан бошлаб Қозоғистон баъзи давлатларга авиапарвозларни тиклайди, дея хабар берди мамлакат Фуқаро авиацияси қўмитаси матбуот хизмати.
Халқаро рейслар коронавирус инфекциясининг пайдо бўлиши ва тарқалиши олдини олиш бўйича Идоралараро комиссиянинг қарорига биноан, Қозоғистон Республикаси Соғлиқни сақлаш вазирлиги тавсиялари, эпидемиологик вазият даражасини ҳисобга олган ҳолда тикланади.
Хусусан, 2020 йил 20 июндан бошлаб Туркия, Хитой, Жанубий Корея, Таиланд, Грузия ва Японияга халқаро рейслар босқичма-босқич амалга оширилади.
Халқаро йўналишлар бўйича парвозлар сони ҳаво қатнови тўғрисидаги ҳукуматлараро битимлар ва ҳар бир йўналишдаги самолётларнинг тижорат юкига қараб белгиланади.
Қўмитадан қайд этишларича, авиарейслар ва чипталарни сотиш авиакомпаниялар веб-сайтларида эълон қилинган жадвалга мувофиқ амалга оширилади. Бу фуқароларнинг юқорида кўрсатилган мамлакатлар билан давлат чегараси орқали ҳаракатланишига қўйилган чекловлар олиб ташланиши ҳамда Қозоғистон ва тегишли давлатларда эпидемиологик вазият яхшиланишига боғлиқ бўлади.
