Туркия Ироқда курд жангариларига қарши ҳарбий амалиёт бошлади

Туркия қуролли кучлари Ироқ шимолида Курдистон ишчи партияси аъзоларига қарши Pence-Kartal (Бургут панжаси) деб номланган янги ҳарбий амалиёт бошлади. Амалиёт курдларнинг полиция бўлимига ва турк хавфсизлик кучлари жойлашган ҳудудларга ҳужумидан кейин бошланган.

“Бургут панжаси” амалиёти бошланди. Самолётларимиз террорчилар бошига ғорларни қулатмоқда”, деб маълум қилинган Туркия мудофаа вазирлигининг Twitter-аккаунтида.

Anadolu ахборот агентлигининг хабар беришича, ушбу амалиёт Анқаранинг ўзини мудофаа қилишга қонуний ҳуқуқи ҳисобланади. Турк ҳарбийлари Ироқнинг шимолий туманлари - Синжар, Карачак, Зап, Авасин-Басён, Хакуркада ҳамда Қандил тоғларида КИПнинг террорчи отрядларига ҳужум қилмоқда.  

Маълум қилинишича, Туркия қирувчи самолётлари жангариларнинг позицияларига зарбалар берган.

Амалиётга Туркия мудофаа вазири Хулуси Акар ва қуролли кучлар қўмондонлиги аъзолари Туркия ҳарбий-ҳаво қўмондонлик марказидан бошчилик қилмоқда. 

Маълумотларга кўра, Туркияда КИП билан 2015 йил июлда қуролли ихтилоф яна авж олгандан кейин курд жангарилари қўлидан мингга яқин полициячи ва ҳарбий ҳамда 500га яқин фуқаро ҳалок бўлган. Шу билан бирга, ушбу давр ичида турк хавфсизлик кучлари КИПнинг 10 мингдан кўпроқ аъзосини йўқ қилган.   

Туркия президенти Ражаб Тоййиб Эрдўғаннинг таъкидлашича, 1984 йилдан 2020 йил мартигача курд жангарилари Туркия хавфсизлик кучларининг 7500 ходимини ва 6800 фуқаронинг умрига зомин бўлган.