Ўзбекистонда карантин даврида 142,5 мингта кичик бизнес субъекти жами 332,8 млрд сўм миқдоридаги солиқлардан озод этилган. Бу ҳақида Давлат солиқ қўмитаси бошқарма бошлиғи ўринбосари Музаффарюсуф Назаров маълум қилди.
«2020 йил 1 июндан 1 сентябргача кичик корхоналар ер ва мол-мулк солиқларини тўлашдан озод қилинди. Бозорлар ва савдо мажмуалари, кинотеатрлар, умумий овқатланиш корхоналари, жамоат транспортлари корхоналари, спорт-соғломлаштириш муассасалари, йўловчи ташиш, маиший хизмат кўрсатиш, шу жумладан, банкетлар ташкил этиш учун мазкур имтиёздан фойдаланиши мумкин.
Ҳозиргача мамлакат бўйича имтиёзга эга бўлган 142,5 мингта кичик бизнес вакиллари мавжуд бўлиб, улар 332,8 млрд сўмлик солиқлардан озод бўлади. Бу сумма икки турдаги – мол-мулк ва ер солиғи ҳиссасига тўғри келади», деди Назаров АОКАда ўтказилган брифингда.
Қайд этилишича, кичик тадбиркорлик субъектларига фоизсиз кечиктириш имконияти (бўлиб-бўлиб тўлаш) тақдим этилган, апрель-май ойлари учун тўланиши лозим бўлган мол-мулк ва ер солиғи суммаларидан воз кечилган.
«Бугунги кунда бу ҳуқуқдан фойдаланишни истаган 4259та субъект солиқ органларига мурожаат қилган. Натижада 2422та солиқ тўловчининг 123 миллиард сўм миқдоридаги кечиктирилган солиқларидан воз кечилган.
Ҳозирда яна умумий миқдори 109 млрд сўм бўлган 1837та мурожаат кўриб чиқилмоқда», деди қўмита вакили.
