Қозоғистондаги вазирлар ҳамда вилоятлар раҳбарлари таътил ва дам олишни унутиши ва эътиборларини пандемия ҳамда нефть нархининг тушиб кетиши оқибатида вужудга келган муаммоларни ҳал қилишга қаратишлари керак. Бу ҳақда мамлакат президенти Қосим-Жўмарт Тўқаев ҳукуматнинг кенгайтирилган йиғилиши чоғида айтди.
"Биз ижтимоий-иқтисодий ривожланишнинг қийин босқичида турибмиз. Ҳукумат ва ҳокимларнинг янада кучаядиган инқироздан чиқиш бўйича моҳирона ҳаракатлари лозим", - дея унинг сўзларидан иқтибос келтиради президент матбуот хизмати.
"Вазирлар, ҳокимлар, президент аппарати ходимлари – ҳеч қандай таътил йўқ, чунки вазият қалтис. Таътил, дам олиш каби сўзларни унутинг", - деди Тўқаев.
У шунингдек, маблағ ва кучларни шубҳали стратегия ва дастурларга сарфламаслик кераклигини айтди.
Охирги маълумотларга кўра, Қозоғистонда коронавирус юқтириш билан боғлиқ ҳолатлар 54,7 мингдан ошган, 264 киши вафот этган.
