Тўқаев Қозоғистонни Олтин Ўрда вориси деб эълон қилди

Қозоғистон президенти Қосим-Жўмарт Тўқаев ўз мамлакати Олтин Ўрданинг вориси эканини таъкидлаб, унинг сиёсий ва иқтисодий моделини ўрганишга чақирди.

Фото: akorda.kz

Бу ҳақда у «Олтин Ўрда чўл цивилизацияси модели сифатида» форумининг очилишида маълум қилди, деб хабар берди Tengrinews.

Тўқаевнинг сўзларига кўра, Қозоғистон Конституциясининг янги таҳририда Буюк дашт ва унинг тарихий мероси давомийлиги мустаҳкамланган. Тўқаевнинг айтишича, Жўжи улусининг гуллаб-яшнаган даврида унинг ҳудуди 6 миллион квадрат километрдан ошган, Ўрдада 100 га яқин шаҳар бўлган ва Жўжилар сулоласи ҳукмронлиги олти асрдан ортиқ давом этган.

У Ўрданинг пул тизимига алоҳида эътибор қаратди. Мутахассисларнинг фикрига кўра, тахминан 28 миллион кумуш танга зарб қилинган. Қозоғистон миллий валютаси - тенге номи Ўрда «данг»ига бориб тақалиши рамзий маънога эга. «Бу Олтин Ўрда минтақада пул муносабатлари стандартларига асос солганидан далолат беради», деди Тўқаев.

Қозоғистон Миллий банки яқинда Олтин Ўрдага бағишланган мингта кумуш танга чиқарди.

Президент Олтин Ўрда тарихини қайта кўриб чиқиш зарурлигини таъкидлаб, тарихий меросни низо қуролига айлантирмасликка чақирди. Ўрда XIII-XV асрларда рус ерларининг каттагина қисми устидан ҳукмронлик ўрнатди: рус князликлари вассал қарамликда бўлиб, хонларга ўлпон тўлар ва князлик қилишга рухсат олар эди. Ўрда князликларнинг сиёсий тизимига таъсир ўтказиб, уларнинг ички низоларига аралашган. XV аср охирига келиб, қарамлик заифлашди ва 1480 йилдан кейин, Москва ўлпон тўлашни тўхтатгач ва Ўрда рус ерлари устидан назоратни йўқотди.