Saudi Aramco’нинг соф даромади 73 фоизга камайиб кетди

Саудия Арабистонининг Saudi Aramco давлат нефть компанияси жорий йилнинг 2-чораги ва биринчи ярим йиллиги бўйича молиявий ҳисобот тақдим қилди. 2-чоракда компаниянинг соф даромади 73 фоизга камайиб, 6,6 млрд долларни ташкил қилган. Ярим йиллик якунларига кўра эса компаниянинг даромади 50 фоизга қисқариб, 23,2 млрд долларгача тушиб кетган.  

Компаниянинг бундай салбий натижалари пандемия вақтида энергия ташувчиларга талаб камайгани ва нефть нархининг кескин пасайиб кетиши сабабли кутилмаган ҳолат бўлмаган. 

Бошқа нефть-газ компаниялари ҳам зарар кўрганини маълум қилган. Шу сабабли улардан кўпчилиги дивидендларни қисқартира бошлаган. Жумладан, 2-чорак бўйича зарар кўрганини маълум қилган British Petroleum 2010 йилдан бери илк бор дивидендларни қисқартиришини эълон қилган. Shell компанияси эса 1-чоракдан кейиноқ дивиденлари пасайишини эълон қилган. Бу қисқартириш компания учун Иккинчи жаҳон урушидан бери биринчиси бўлган.

Saudi Aramco бошқа энергетик компаниялардан фарқли, ҳозирча дивидендларни қисқартирмоқчи эмас. У аввал кутилгандек, ўз акциядорларига 18,75 млрд доллар дивиденд тўлаб беради.