Австралия аҳолиси коронавирусга қарши бепул эмланади

Австралия ҳукумати коронавирусга қарши вакцина ишлаб чиқаётган AstraZeneca компанияси билан вакцина етказилиши бўйича шартнома имзолади. Шартномага кўра, Австралия вакцинадан керакли миқдорда олади.

“Шартнома доирасида бир ҳар австралияликнинг вакцина олишини таъминлаймиз”, деб айтган Австралия бош вазири Скотт Моррисон. Унинг таъкидлашича, AstraZeneca’нинг вакцинаси ўзининг самарадорлигини кўрсатса, ҳукумат ундан зарур миқдорда харид қилиб, у билан мамлакатнинг барча 25 млн. лик аҳолиси бепул эмланади.

“Агар вакцина синовлари муваффақиятли ўтса, биз вакцинани кейинги йил бошида олишга умид қилмоқдамиз. Агар бу эртароқ юз берса, ундан ҳам яхши бўлади”, деб қўшимча қилган бош вазир.  

Тиббий ходимлар кимлар биринчи бўлиб эмланишини белгилайдилар. 

“Табиийки, вакцинани биринчи бўлиб аҳолининг вирус олдида заиф бўлган қатламлари, кексалар, соғлиқни сақлаш соҳаси ходимлари ва имконияти чекланган одамлар олади”, деб таъкидлаб ўтган Австралия соғлиқни сақлаш вазири Грег Хант.   

Мутахассисларнинг таъкидлашича, эмлашда, шунингдек, касалланиш бўйича ҳудудлар бўйича статистика ва вакцинанинг турли ёшдагиларга таъсири ҳисобга олинади.  

AstraZeneca ўз вакцинасини Оксфорд университети билан биргаликда ишлаб чиқмоқда. Айни вақтда вакцинанинг иккинчи босқич синовлари ўтмоқда: у турли давлатлардаги бир неча минг кишида синалмоқда. Ушбу вакцина учун бир нечта давлат ҳамда ташкилотлардан жами 3 млрд доза учун буюртма олинган. Вакцина сентябрданоқ етказиб берила бошланиши мумкин. 

Австралия бош вазири фуқароларни вакцина самарали бўлишининг 100 фоизлик кафолати йўқлигидан огоҳлантирган, бироқ “ушбу вакцина айни вақтда дунёдаги энг яхшиларидан бири эканини” айтган. Вакцинани эмлаш  учун қўллаш мақсадга мувофиқлиги аён бўлгандан сўнг шартноманинг кейинги бандлари, жумладан вакцина нархи ва унинг етказиб берилиш муддатлари муҳокама қилинади. 

Шу билан бирга, расмий Канберра бир компанияга ишониб қолмай, бошқа компаниялар билан ҳам ушбу масала бўйича алоқани қўллаб-қувватламоқда.

Скотт Моррисоннинг таъкидлашича, эмлаш бутун аҳоли учун мажбурий бўлади. Эмланиши тиббий сабабларга кўра мумкин бўлмаганларгина бундан мустасно бўлади. 

Австралия расмийларининг баҳолашича, коронавирус бошқа хавф солмаслиги учун аҳолининг 95 фоизида унга қарши иммунитет бўлиши керак.