Америкалик тадбиркор Илон Маск компанияси 18 августда Starlink интернет тармоғи учун мўлжалланган навбатдаги 58 та сунъий йўлдошни орбитага учирди. Сунъий йўлдошлар орбитага Falcon 9 ракетасида олиб чиқилган.
Ракета АҚШнинг шарқий соҳилбўйи вақти билан 10:31да Канаверал бурнидаги космодромдан учирилган.
Бу Starlink тармоғи сунъий йўлдошларининг 11-марта орбитага чиқарилишидир. Илк шундай парвоз 2019 йил майида амалга оширилган. Аввалги 57 та сунъий йўлдош эса жорий йилнинг 7 августида учирилганди.
Эндиликда SpaceX тармоғи сунъий йўлдошлари сони 595 тага етди.
SpaceX сайёрамизнинг исталган бурчагидан уланиш мумкин бўлган кенг полосали интернет тармоғини яратишнинг 1-босқичда орбитада 12 мингта сунъий йўлдош жойлаштиришни ва 2-босқичда улар сонини 30 мингтага етказишни режалаштирмоқда.
