Расмий Абу-Даби нефть қазиб олиш ҳажмини қисқартириш бўйича тузилган ОПЕК+ битимини бузганини ва август ойида белгиланган ҳажмдан кўпроқ нефть қазиб олганини тан олди. Таъкидланишича, БАА бунга иссиқ ҳаводан сақланиш учун борган.
Августда БАА кунига 100 минг баррел кўпроқ нефть қазиб олган. Дастлаб буни нефть олиниши ортидан кузатувчи блогерлар пайқашган. Сўнгра ушбу маълумотни БААнинг энергетика ва инфратузилма вазири Суҳайл ал-Мазравий тасдиқлаган.
“БАА нефть қазиб олишни кунига 2,69 млн баррелгача етказди. Бу электр энергияга эҳтиёжни қондириш чораси сифатида амалга оширилган”, деб ёзган вазир твиттерда. У БАА ОПЕК+ битимига содиқлигини қўшимча қилган.
Khaleej Times нашри маълумотларига кўра, августда Амирликларда ҳаво ҳарорати кундузи 40-50 даражагача етган. Шу билан бирга, у гўёки 65 даражадек ҳис қилинган.
Нефть маҳсулотлари ва газ БААда электр энергия ишлаб чиқаришда қўлланувчи асосий ёнилғи турлари ҳисобланади. Августда мамлакат араб оламидаги биринчи атом электр станциясини ишга туширган: станциянинг 1400 МВтли 4 та блокидан биринчиси фойдаланишга киритилган. Станция БААнинг электр энергияга эҳтиёжининг чорак қисмини қондира олади.
Нефть бозорида таклифнинг талабдан ошиб кетиши сабабли юз берган инқироз ва бу билан боғлиқ ҳолда нархлар кескин тушиб кетиши ортида нефть қазиб олувчи давлатлар апрелда дунё бўйлаб қазиб олинадиган кунлик нефть ҳажмини 9,7 млн баррелгача қисқартиришга келишиб олган эди. Ушбу чора иш бериб, деярли ноль қийматга тушиб кетган нефть қимматлаша бошлаган.
