Кипр ҳукумати 18 йил ичида берилган барча “олтин паспортлар”ни текширади

Кипр ҳукумати вакили Кириакос Коусиоснинг маълум қилишича, паспорт берилиши қонунга хилоф бўлмаганини текшириш учун махсус мустақил комиссия ташкил этилади. Комиссияни шакллантириш билан Кипр бош прокурори шуғулланади. Комиссия тергов ўтказишда кенг ваколатлар олади. 

Аввалроқ Al Jazeera телеканали Кипр ҳукумати “олтин паспортлар”ни жиноятларда гумон қилинган ёки айбланган хорижликларга берганини маълум қилган. Кипр ички ишлар вазирлигида таъкидланишича, инвестициялар эвазига мамлакат фуқаролигини олганларнинг барчаси расмий идоралар томонидан текширилган ва уларнинг барчаси талаб этилган шартларга мос келган.     

Кипр август ойида ушбу дастур шартларини ўзгартиришга қарор қилган. Эндиликда бир йил ёки ундан кўпроқ вақтдан бери ўз лавозимидан кетган “сиёсий аҳамиятдаги шахслар” (давлатлар раҳбарлари ва юқори лавозимли шахслар, депутатлар, судьялар, мэрлар, қуролли кучлар зобитлари, элчилар ва ҳ.к.) ўз капиталлари келиб чиқиши манбаини исботлашлари керак бўлади. Бундан ташқари, ариза берувчи яшаган давлат томонидан унинг судланмаганлиги ҳақидаги маълумотнома Кипр фуқаролигини олиш учун ҳужжатлар топширилишидан камида 6 ой (аввал бу муддат 3 ой бўлган) олдин берилган бўлиши лозим.