Сингапурда Apple Watch соатлари билан шуғулланувчиларга пул тўланади 

Сингапур ҳукумати ва Apple компанияси соғлиқни сақлаш соҳасида қўшма лойиҳани йўлга қўйишини эълон қилди. LumiHealth деб номланган ташаббус октябрда старт олади ва 2 йил давом этади.

Сингапурликлар LumiHealth дастурини ўзларининг iPhone телефонлари ва Apple Watch соатларига ўрнатиб, ўзларининг жинси, ёши ва вазнига қараб белгиланадиган жисмоний машқларни бажаришади. LumiHealth фойдаланувчилари сузиш, югуриш билан шуғулланиб, 380 Сингапур доллари (280 доллар) ишлаб олишлари мумкин. Бундан ташқари, дастур шифокор ҳузурига бориш ёки эмланиш ҳақида эслатмалар, соғлом овқатланиш ва уйқуни яхшилаш бўйича тавсиялар бериб туради.

Apple’да таъкидланишича, дастурда иштирок этиш ихтиёрий бўлиб, фойдаланувчилар ҳақидаги маълумотлар шифрланган кўринишда сақланади, улар маркетинг мақсадларида сотилмайди ёки қўлланмайди.