Бельгияда 21 ойлик антирекорддан кейин ҳукумат шакллантирилди

Бельгияда тўлақонли ҳукуматни шакллантириш учун 653 кун талаб этилди. Бу ўзига хос антирекорд бўлиб, аввалги “рекорд” ҳам Бельгияга тегишли бўлган.

Фото: saga.ua

Бельгиянинг янги ҳукумати 1 октябрда қасамёд келтиради ва ўз ишини бошлайди.

Янги бош вазир Александр де Кроо бўлади, ҳукмрон коалицияга 7 та сиёсий партия кирди.

Шу билан бирга коалицияга 2019 йил майидаги парламент сайловларида ғалаба қозонган иккита фламанд радикал партияси - Nieuw-Vlaamse Alliantie ва Vlaams belang киритилмаган.

Шу тариқа, Бельгиянинг янги ҳукумати 21 ойлик сиёсий инқироздан кейин шакллантирилди. Аввалги антирекорд 2010-2011 йилларда қайд қилинган бўлиб, у 589 кунни ташкил қилган.