Россияда коронавирусдан кунлик ўлим ҳолатлари сони бўйича рекорд қайд этилди

14 октябрь куни Россияда коронавирус инфекциясига чалинган 286 киши вафот этди. Бу ҳақда Россия Федерациясининг коронавирусга қарши курашиш бўйича оператив штаби хабар берди. Бу кўрсаткич мамлакатда пандемия бошланганидан буён кунлик ўлимлар сони бўйича рекорд натижа ҳисобланади.

Фото: EPA/Vostock-photo

Россияда коронавирус кириб келганидан буён, ушбу касалликдан жами вафот этганлар сони 23 минг 491 кишига етди.

Шунингдек, кеча 13 минг 754та янги касалланиш ҳолатлари қайд этилган бўлиб, янги ҳолатларнинг энг кўп қисми Москва ва Санкт-Петербург шаҳарларида кузатилмоқда.

Расмий маълумотларга кўра, Россияда пандемия бошланганидан буён касалликка чалинганларнинг жами сони 1 миллион 354 минг 163 кишига етган. Беморларнинг 1 миллион 48 мингдан ортиғи соғайган.

«Роспотребнадзор» маълумотларига кўра, ҳозирда Россияда бир кунда 478 мингта тест олинмоқда, аввал кунига 436 мингта тест олинаётганди. Бутун пандемия даврида 52,2 миллиондан ошиқ тест топширилган.

#Россия #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.