Бразилияда Astrazeneca’нинг вакцинаси синовлари иштирокчиси вафот этди

Бразилияда Astrazeneca компаниясининг коронавирусга қарши вакцинаси синовларида иштирок этган кўнгилли вафот этди.

Фото: Getty Images

O GLOBO нашрининг хабар беришича, вафот этган иштирокчи 28 ёшли эркак бўлган ва унда ҳеч қандай ёндош касалликлар бўлмаган.

Эркак вакцина ёки плацебо олгани ҳақида тасдиқланган маълумот йўқ. Вакцина ишлаб чиқувчиларига яқин манбаларнинг таъкидлашича, эркак плацебо олган.

Вафот этган кўнгилли Рио-де-Жанейродаги хусусий шифохонада коронавирусга чалинган касалларни даволаш бўлимида шифокор бўлиб ишлаган.

У синовларда июлда иштирок этган, сентябрда эса коронавирусга чалинган.

AstraZeneca кўнгиллининг ўлими бўйича расмий позицияга эга эмаслигини маълум қилган. Бу орада вакцина синовлари хавфсизлигини баҳолаш бўйича халқаро қўмита кўнгиллининг ўлимига қарамай, вакцина синовларини давом эттиришни тавсия қилган.

Аввалроқ AstraZeneca компанияси ва Оксфорд университети биргаликда ишлаб чиқаётган вакцинанинг синовлари кўнгиллилардан бирида ножўя таъсир келтириб чиқаргани сабабли тўхтатилганди. Таъкидланишича, синовлар иштирокчисида орқа миянинг яллиғланиш касаллиги - кўндаланг миелит аниқланган. Мутахассислар буни эмлашнинг иккиламчи таъсири бўлиши мумкинлигини тахмин қилишган.

Тайёрлаган Шуҳрат Раҳимов

#Бразилия #вакцина #AstraZeneca

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.