Мисрда тинчликпарвар кучлар вёртолёти қулади

Мисрнинг Синай яриморолида бортида тинчликпарварлар бўлган вертолёт ҳалокатга учради. Бунинг оқибатида 8 киши ҳалок бўлган.

Фото: Xinhua / Global Look Press

AFP ахборот агентлиги маълумотларига кўра, ҳалокат 6 нафар америкалик, бир нафардан франциялик ва чехиялик ҳарбий ҳаётини олиб кетган. Маълум қилинишича, UH-60 Black Hawk вертолёти разведка парвозини амалга ошираётган вақтда яриморол жанубидаги Тиран ороли яқинида қулаган. Фожианинг дастлабки сабаби сифатида техник носозлик айтилган.

Вертолёт халқаро тинчликпарвар миссияси MFO’га тегишли бўлган. Ушбу миссия Миср ва Исроил ўртасидаги 1979 йилда имзоланган тинчлик сулҳи бажарилиши ортидан кузатув олиб боради ва Синайда 1982 йилдан бери жойлаштирилган. Унинг таркибига 12та давлат ҳарбийлари киради. MFO’да ўз вертолётларидан бири ҳалокатга учрагани тасдиқланган, бироқ тафсилотлар келтирилмаган.