SpaceX компаниясининг янги фазовий кемаси Crew Dragon-1 бортида 4 астронавт билан бирга Халқаро коинот станцияси томон учирилди. Бу кеманинг ХКСга биринчи мунтазам парвози ҳисобланади.
Кема АҚШнинг шарқий соҳили вақти бўйича 15 ноябр соат 19:27да Falcon 9 ракетаси ёрдамида Канаверал бурнидаги космодромдан учирилди. Кема парвози дастлаб 14 ноябрга белгиланганди, бироқ ноқулай об-ҳаво шароити туфайли бир кунга қолдирилган.
Ракета старт олгандан 9 дақиқа ўтгач унинг биринчи поғонаси Атлантика океанидаги платформага қўнган. Кейинроқ ракетанинг иккинчи поғонаси ҳам ажралиб, кема белгиланган орбитага чиққан.
Кема бортида 3 нафар америкалик астронавт – экипаж сардори Майкл Хопкинс, Виктор Гловер ва Шеннон Уокер ҳамда япониялик астронавт Соити Ногути бор. Улар ХКСда 6 ой қолишади.
SpaceX’нинг биринчи мунтазам миссияси Crew-1 экипажи ҳозирда ХКСда фаолият олиб бораётган 64-экспедиция аъзолари – NASA астронавти Кэтлин Рубинс ва россиялик фазогирлар Сергей Рижиков ва Сергей Куд-Сверчковга қўшилади.
Crew Dragon’нинг ХКС билан туташуви 16 ноябр кечки вақтга белгиланган.
АҚШ президенти Доналд Трамп NASA’ни муваффақиятли парвоз билан табриклаган. У NASA’нинг ривожланишига катта ҳисса қўшганини таъкидлаб ўтган.
“Ажойиб парвоз! Биз NASA билан шуғулланишни бошлаганимиздан олдин у фалокатли аҳволда эди. Ҳозир эса у яна трендда, дунёдаги энг яхши, энг илғор коинот марказидир, ҳаммадан анча олдинда!” – деб ёзган Трамп твиттерда.
Илон Маскнинг SpaceX компанияси одамларни фазога етказишни бошлаган биринчи хусусий компания ҳисобланади. Crew Dragon кемасининг ХКСга биринчи синов парвози 30 май куни ўтказилган. Ўшанда коинот станциясига астронавтлар Даглас Хёрли ва Роберт Бенкен етказилганди.
Ушбу парвоз NASA’нинг шаттллар дастури тугатилгандан кейин АҚШнинг 9 йил ичидаги биринчи бошқарилувчи парвози бўлган. Бу вақт давомида астронавтлар коинот станциясига Россиянинг “Союз” кемаларида етказилган.
