Дунёдаги энг йирик ракета яна фазога парвоз қилди

Илон Маскка тегишли SpaceX компанияси ўзининг энг йирик Starship V3 ракета тизимини навбатдаги синов парвозига муваффақиятли юборди. Ракета бир соатга яқин фазода бўлиб, шундан сўнг Ҳинд океанига бошқарилган тарзда қўнди.

Фото: AP

Синов парвози 23 майга ўтар кечаси Техас штатидаги космодромдан амалга оширилди. Жараён SpaceX ва Х ижтимоий тармоғи орқали жонли эфирда намойиш қилинди.

Маълум қилинишича, ракета фазода ҳаракатланаётганда олти двигателдан бири ишдан чиққан бўлса-да, тизим вертикал ҳолатни сақлаб қолишга ва муваффақиятли қўнишга эришган. Starship космосга чиққанидан кейин Super Heavy тезлаткичидан ажралган ҳолда инерция орқали ҳаракатланган.

Бу Starship дастурининг 2025 йил октябридан буён амалга оширилган илк синов парвози бўлди. Илк Starship прототипи 2023 йил апрель ойида синовдан ўтказилганида, учишдан бир неча дақиқа ўтиб портлаб кетган эди. Кейинги V2 прототиплари билан ҳам бир қатор муаммолар кузатилган.

SpaceX 22 май куни V3 версиясини учиришга биринчи бор уринган, аммо техник носозлик сабаб стартга сониялар қолганда парвоз бекор қилинганди.

Starship тизими икки қисмдан иборат: узунлиги тахминан 70 метр бўлган Super Heavy тезлатгичи ва 50 метрлик юқори босқич — Starship кемаси. Ҳар икки қисм ҳам қайта фойдаланиш учун мўлжалланган.

NASA ушбу ракета ёрдамида 2028 йилга бориб астронавтларни Ойга юборишни режалаштирмоқда. SpaceX эса келажакда инсонларни Марсга етказиш ва у ерда колония ташкил этишни ўз олдига мақсад қилиб қўйган.