Ногиронлик нафақаси кимларга тайинланади ва унинг миқдори қанча бўлиши керак?

Бу савол билан Пенсия жамғармаси матбуот хизматига мурожаат қилдик ва қуйидаги жавобларни олдик:

Нафақа олиш ҳуқуқига тиббий-меҳнат эксперт комиссиялари (ТМЭК) томонидан болаликдан I ва II гуруҳ ногиронлари деб эътироф этилган 16 ёшдан катта шахслар (16 ёшдан катта болаликдан ногирон);

касалликнинг босқичидан қатъи назар, ўн саккиз ёшга тўлмаган ОИВ инфекциясига чалинган шахслар;

нафақа олиш ҳуқуқини берадиган тиббий хулоса мавжуд бўлган тақдирда 16 ёшгача ногирон болалар (ногирон бола);

ёшидан қатъи назар, иш стажига эга бўлмаган I ва II гуруҳ ногиронлиги бўлган шахсларга тайинланади;

Нафақа олиш ҳуқуқига эга бўлган шахслар нафақа олиш ҳуқуқи пайдо бўлгандан сўнг бирор-бир муддат билан чеклашсиз, исталган вақтда унинг тайинланиши учун мурожаат қилишлари мумкин.

Нафақа миқдорининг белгиланиш тартиби қандай?

Ногиронлик нафақаси қуйидаги миқдорларда белгиланади. Яъни:

• 16 ёшгача болаликдан ногирон болаларга — 513 350 сўм (01.09.2020 йил);
• 16 ёшдан катта I гуруҳ болаликдан ногиронларга — 578 967,50 сўм;
• 16 ёшдан катта II гуруҳ болаликдан ногиронларга — 513 350 сўм;
• иш стажига эга бўлмаган I гуруҳ ногиронларига — 380 647,50 сўм
• иш стажига эга бўлмаган II гуруҳ ногиронларига — 315 030 сўм

Тайинлаш тартиби

Фуқаро нафақа тайинлаш тўғрисидаги ариза билан яшаш жойи бўйича Пенсия жамғармаси бўлимига қуйидаги ҳужжатлар билан мурожаат қилади:

ногирон боланинг, шунингдек, 16 ёшга тўлмаган ОИВ инфекциясига чалинган шахснинг ота-онаси, фарзандликка олувчиси, тутинган ота-онаси, васийси ёки ҳомийси томонидан — ногирон бола, шунингдек, 16 ёшга тўлмаган ОИВ инфекциясига чалинган шахснинг туғилганлиги тўғрисидаги гувоҳнома нусхаси, соғлиқни сақлаш муассасалари томонидан белгиланган тартибда бериладиган тиббий хулоса, ариза берган ота-она, фарзандликка олувчи, тутинган ота-она, васий ёки ҳомийнинг паспорти нусхаси;

16 ёшдан катта ОИВ инфекциясига чалинган шахс томонидан — паспортининг нусхаси ва соғлиқни сақлаш муассасалари томонидан белгиланган тартибда бериладиган тиббий хулоса;

фарзандликка олувчи, тутинган ота-она, васий ёки ҳомий томонидан ариза билан мурожаат қилинганда туман (шаҳар) ҳокимининг фарзандликка олиш, васийлик ёки ҳомийликни белгилаш тўғрисидаги қарорининг нусхаси ҳам тақдим этилади;

Пенсия жамғармаси бўлими аризага Пенсия жамғармаси бўлими томонидан тиббий-меҳнат эксперт комиссиясидан олинган 16 ёшдан катта болаликдан ногиронни тиббий текшириш далолатномасидан кўчирмани илова қилади.

Тайинлаш муддати

Ариза барча зарур ҳужжатлар билан тушган кундан бошлаб ўн кундан ортиқ бўлмаган муддатда кўриб чиқилади.

Пенсия жамғармаси бўлими томонидан ариза барча зарур ҳужжатлар билан бирга қабул қилинган кун нафақа тайинлаш учун мурожаат қилинган кун ҳисобланади.

Агар ариза почта орқали жўнатилса ва бунда барча зарур ҳужжатлар тақдим этилган бўлса, у ҳолда ариза жўнатилган жойдаги почта штемпелида кўрсатилган сана нафақа тайинлаш учун мурожаат қилинган кун ҳисобланади.

Нафақа барча зарур ҳужжатлар мавжуд бўлган тақдирда мурожаат қилинган кундан бошлаб тайинланади.