SamAuto икки йил ичида электробуслар ишлаб чиқаришни ўзлаштиради

2020 йил 19 ноябр куни SamAuto компанияси 51-йўналиш (Юнусобод 6-мавзе – Бешёғоч майдони) бўйича ҳаракатланадиган синов электробусини «Тошшаҳартрансхизмат» АЖга тақдим этди. 

Эксплуатация жараёнида SamAuto мутахассислари ўз электробусини ишлаб чиқишда ҳисобга олиш мақсадида йўловчилар ва ҳайдовчиларнинг фикрларини, шунингдек мазкур моделнинг сифати ва функционал вазифаларини ўрганади ва уларнинг мониторингини олиб боради.

Қайд этилишича, SamAuto 2021-2022 йилларда электробуслар ишлаб чиқаришни ўзлаштиришни режалаштирмоқда. Йўловчиларнинг ушбу турдаги транспортга талабларини аниқлаш учун компания «Тошшаҳартрансхизмат» АЖга синов электробусини тақдим этди.

«Ушбу электробус электротранспорт ишлаб чиқариш бўйича жаҳон етакчиларидан бири BYD компанияси томонидан ишлаб чиқарилган. Бир марталик қувватлантириш ҳисобига 300 км масофани босиб ўтади, бу шаҳар автобусининг ўртача бир кунлик масофа босишига мос келади. Тўлиқ қувватлантиришни электр тармоғига юклама камроқ бўлган пайтда 3-4 соат ичида бажариш мумкин. Электробуслар хизмат кўрсатиш жиҳатидан содда, шовқинсиз ҳамда газ ва дизел транспортига қараганда кам харажат талаб қилади», — деди SamAuto бош директори ўринбосари, маркетинг ва сотувлар бўлими раҳбари Илҳом Ярашев.

Электробуснинг узунлиги 12 метрни, йўловчиларни ташиш ҳажми — 76 кишини ташкил қилади. Унинг поли паст: зинапоялар ва подиумнинг йўқлиги туфайли йўловчилар (шу жумладан пенсионерлар, аравачаларда ҳаракатланувчи йўловчилар, алоҳида эҳтиёжли кишилар) салон бўйича эркин ҳаракатлана оладилар. Шунингдек, электробус видеокузатув камераси ва автоматик ҳаво намлигини сақлаш ва иситиш тизими билан жиҳозланган.

2030 йилгача Атроф-муҳитни муҳофаза қилиш концепциясига мувофиқ Ўзбекистон ижтимоий транспортининг камида 50 фоизи зарарли моддаларни ҳавога чиқаришни камайтириш учун муқобил ёқилғи турларига ўтиши керак.

Эртага, 20 ноябр кунидан бошлаб йўловчилар ушбу электробус хизматидан фойдаланишлари учун «Тошшаҳартрансхизмат» АЖ томонидан 51-сонли (Юнусобод 6-мавзе – Бешёғоч даҳаси) йўналишга чиқарилади.