AstraZeneca вакцинасининг самарадорлиги ҳозирча ноаниқ – Bloomberg

Оксфорд университети ишлаб чиққан AstraZeneca вакцинаси синов вақтида йўл қўйилган хатолар сабабли унинг самарадорлиги натижаси нотўғри бўлиши мумкин. Бу ҳақда Bloomberg хабар бермоқда.

Қайд этилишича, Британия вакцинаси якуний синовларда ўртача 70 фоиз ҳамда максимал 90 фоиз самарадорлик кўрсатган.

Максимал самарадорлик дастлабки эмлашда камроқ доза қабул қилганларда қайд этилган. Кейинроқ компания дозанинг камлиги ишлаб чиқариш жараёнидаги хато туфайли юз берганини билдирган.

Бундан ташқари, кейинчалик маълум бўлишича, юқори самарадорлик қайд этилган гуруҳдагилар фақат кичик ёшдаги одамлар бўлган. Бу маълумот AstraZeneca ва университет хабарида айтилмаган.

Bloomberg таҳлилчиси Сэм Фазелининг айтишича, самарадорликдаги фарқ синов учун танлов демографиясидаги  тафовут натижасида келиб чиққан.

Унинг сўзларига кўра, вакцинанинг ҳақиқий самарадорлиги ҳозирча ноаниқ.

Аввалроқ британияликларнинг вакцинаси сезиларли даражада арзонлиги ҳамда уни дунёнинг исталган бурчагига осонлик билан етказиб бериш мумкинлиги айтилганди. Ишлаб чиқарувчиларнинг маълум қилишича, вакцинани Цельсий бўйича 2-8 даражада сақлаш ва етказиб бериш мумкин, вакцинация жараёни эса алоҳида шароитларни талаб қилмайди.