АҚШнинг Time нашри баскетбол юлдузи Леброн Жеймсни “Йил спортчиси” деб топди.
Нашр таҳририяти “Лос-Анжелес Лейкерс” ўйинчисини АҚШдаги ирқий тенгсизликка қарши курашдаги ҳамда сайловчилар фаоллигини оширишга қаратилган кампаниялардаги иштирокини қайд қилиб ўтган. Нашрнинг таъкидлашича, АҚШнинг кўплаб спортчилари Леброн Жеймсдан ўрнак олиб, ушбу фаолиятга қўшилган.
Жумладан, спортчи 3 ноябрда ўтган АҚШ президенти сайловлари олдидан сайлов участкаларига ёшларни жалб қилиш бўйича ишларда ёрдамлашган.
Жеймс октябрда Миллий баскетбол ассоциацияси плей-офф босқичи финал сериясининг энг қимматли ўйинчиси деб топилганди. У тўртинчи марта ушбу номга сазовор бўлиб, уни учта турли жамоа билан қўлга киритган тарихдаги биринчи баскетболчига айланди. Ундан кўра бу унвонга фақатгина Майкл Жордан кўпроқ сазовор бўлган.
36 ёшли Леброн МБАнинг 4 карра чемпиони ҳисобланади. Спортчи чемпионлик унвонига “Майами хит” сафида 2 марта, “Кливленд кавалерс” ва “Лос-Анжелес Лейкерс” сафида эса бир мартадан эришган.
