Эронда Amad News янгиликлар портали раҳбари қатл қилинди

Руҳулла Зам 2019 йил октябрда Ислом инқилоби қўриқчилари корпуси кучлари томонидан қўлга олинганди. Маълумот берилишича, журналист хориж махсус хизматлари билан ҳамкорлик қилган.

Фото: Ali Shirband/Mizan News Agency via AP Photo

Эронда Amad News янгиликлар портали раҳбари Руҳулла Зам қатл қилинди. Бу ҳақда Tasnim агентлиги хабар бермоқда.

Қайд этилишича, у портал ҳамда Telegram-канални бошқарган. Мамлакат олий суди июнда эълон қилинган ҳукмни бир неча кун аввал тасдиқлаган.

Зам 2019 йил октябрда Ислом инқилоби қўриқчилари корпуси кучлари томонидан қўлга олинганди. Таъкидланишича, разведка уни бир неча йил кузатган. Маълумот берилишича, журналист хориж махсус хизматлари билан ҳамкорлик қилган.

Руҳулла Зам 2017-2018 йилларда Эрондаги норозилик намойишларини фаол ёритиш билан шуғулланган. Эрон ҳукумати Amad News порталини ҳукуматга қарши ресурс деб топган.