Twitter Трампнинг штабига тегишли аккаунтни блоклади

Бир неча кун аввал Доналд Трампнинг Facebook ва Instagram’даги саҳифалари номаълум муддатга блоклаб қўйилганди.

Фото: REUTERS / Jonathan Ernst

Twitter ижтимоий тармоғи АҚШ президенти Доналд Трамп ҳамда унинг сайловолди штабига тегишли аккаунтларни блоклади.

Аввалроқ штаб саҳифасида Трампнинг тармоқ унинг саҳифасини блоклагани учун ижтимоий тармоқни танқид қилган баёноти жойлаштирилганди. У АҚШ президентининг расмий саҳифасида ҳам шундай баёнотни жойлаштирган, аммо баёнот модераторлар томонидан ўчирилганди.

Трамп ўз баёнотида ижтимоий тармоқ раҳбариятини сўз эркинлигини чеклаш ҳамда фаолиятини "демократлар ва радикал сўллар" билан мувофиқлашган ҳолда олиб бораётганликда танқид қилганди.

Бир неча кун аввал Доналд Трампнинг Facebook ва Instagram’даги саҳифалари номаълум муддатга, камида президентлик муддати якунлангунгача блоклаб қўйилганди.

Facebook асосчиси Марк Цукербергнинг таъкидлашича, “охирги 24 соат ичида АҚШда юз берган карахтга солувчи воқеалар” Трамп президентлик муддатининг қолган қисмини сайланган президент Жо Байденга ҳокимиятнинг тинч ва қонуний йўл билан топширилишига путур етказиш учун қўллаши мумкинлигини кўрсатди.