АҚШ эмлаш миқёсини кенгайтириш учун вакцина захирасидан воз кечади

Ҳозирга келиб АҚШ бўйича тақсимланган 24,5 млн доза вакцинанинг 8,9 млн дозасидангина фойдаланилган.

АҚШ ҳукумати коронавирусга қарши эмланадиган аҳоли қамровини кенгайтириш мақсадида биринчи дозани олганлар учун иккинчи доза сифатида бериладиган вакциналарни захира сифатида сақламайди.

Бу ҳақда Pfizer Inc. ва BioNTech ҳамда Moderna Inc. компанияларининг вакцина ишлаб чиқариш жадвалига таяниб АҚШ соғлиқни сақлаш вазири Алекс Азар маълум қилди.

"Одамлар вакцинанинг иккинчи дозасини олишади деб айтиш учун ишлаб чиқариш суръати етарли даражада аниқ", - деди Азар.

Унинг айтишича, АҚШ маъмурияти штатлар ҳукуматларига эмланадиганлар тоифасини кенгайтиришни тавсия қилади – биринчи навбатда ёши 65дан юқори бўлган соғлом одамлар ҳамда ёши 65дан кичик бўлган беморлар қамраб олинади.

ОАВнинг маълумот беришича, ҳозирга келиб АҚШ бўйича тақсимланган 24,5 млн доза вакцинанинг 8,9 млн дозасидангина фойдаланилган.

Worldometers порталининг маълумотига кўра, АҚШда коронавирус билан боғлиқ 23,1 миллионта ҳолат аниқланган, 386,2 мингдан ортиқ киши вафот этган.

#АҚШ #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.